പത്തനംതിട്ട: മന്ത്രി വീണാ ജോര്ജിന് ഇനി സീറ്റ് നല്കേണ്ടതില്ലെന്ന ആവശ്യവുമായി ഭര്ത്താവ് ഡോ.ജോര്ജ് ജോസഫ് സിപിഎം നേതാക്കളെ സമീപിച്ച വിവരം പുറത്തുവന്നതോടെ ഇടത്, വലത് ക്യാമ്പുകളില് ആകാംക്ഷ. 2016ല് വീണാ ജോര്ജിന് സീറ്റ് ആവശ്യപ്പെട്ടു രംഗത്തുവന്ന ജോര്ജ് ജോസഫ് തന്നെ ഇത്തവണ ഭാര്യയെ മത്സരിപ്പിക്കേണ്ടതില്ലെന്ന ആവശ്യവുമായി കഴിഞ്ഞദിവസം സിപിഎം നേതാക്കളെ ഫോണില് ബന്ധപ്പെട്ടതായാണു സൂചന.
കുടുംബാംഗങ്ങളില് മറ്റു ചിലരും വീണാ ജോര്ജിനെ മത്സരിപ്പിക്കരുതെന്ന ആവശ്യവുമായി രംഗത്തുണ്ട്. ഇക്കാര്യം ഇന്നലെ ചേര്ന്ന സിപിഎം ജില്ലാ സെക്രട്ടേറിയറ്റ് യോഗത്തിലാണ് ആദ്യം ചര്ച്ചയ്ക്കു വന്നത്. യോഗത്തില് പങ്കെടുത്ത കേന്ദ്ര കമ്മിറ്റിയംഗം വിഷയം സംസ്ഥാന സെക്രട്ടേറിയറ്റിനു വിട്ടു. വീണാ ജോര്ജ് സംസ്ഥാന സമിതിയംഗം കൂടിയായതിനാല് വിഷയം ആദ്യം അവിടെ ചര്ച്ച ചെയ്യട്ടെയെന്നതായിരുന്നു തോമസ് ഐസക്കിന്റെ നിലപാട്.
മാധ്യമ പ്രവര്ത്തകയായിരുന്ന വീണാ ജോര്ജിനെ 2016ല് ആറന്മുളയില് മത്സരരംഗത്തിറക്കിയത് പ്രത്യേക രാഷ്ട്രീയ സാഹചര്യത്തിലായിരുന്നു. അന്ന് ഓര്ത്തഡോക്സ് സഭ സെക്രട്ടറിയായിരുന്ന ഡോ.ജോര്ജ് ജോസഫ് ആ വഴിക്കും ചില കരുനീക്കങ്ങള് നടത്തി. ആറന്മുള സീറ്റ് മോഹിച്ചിരുന്ന സിപിഎം നേതാക്കളെ ഞെട്ടിച്ച് പാര്ട്ടി സ്ഥാനാര്ഥിയായി വീണാ ജോര്ജ് രംഗപ്രവേശം ചെയ്തു. 2016ല് ആറന്മുളയില് വിജയിച്ചതോടെ രാഷ്ട്രീയത്തില് വീണയുടെ ഉയര്ച്ച വളരെവേഗം ആയിരുന്നു. 2019ലെ ലോക്സഭ തെരഞ്ഞെടുപ്പില് പത്തനംതിട്ട പാര്ലമെന്റ് മണ്ഡലത്തില് എല്ഡിഎഫ് സ്ഥാനാര്ഥിയായി മത്സരിച്ചെങ്കിലും വിജയിച്ചില്ല.
2021ല് വീണ്ടും ആറന്മുളയില് സ്ഥാനാര്ഥിയായി. വന് ഭൂരിപക്ഷത്തോടെ രണ്ടാം ഊഴത്തിലും നിയമസഭാംഗമായി. പിണറായി വിജയന്റെ രണ്ടാം സര്ക്കാരില് ആരോഗ്യവകുപ്പിന്റെ മന്ത്രിയുമായി. രണ്ട് ടേം പൂര്ത്തീകരിച്ചവര്ക്ക് ഇനി സീറ്റില്ലെന്ന സിപിഎമ്മിന്റെ മുന്കാല തീരുമാനങ്ങളെയെല്ലാം മാറ്റിനിര്ത്തി ഇത്തവണ ആദ്യം തന്നെ വീണാ ജോര്ജ് എന്ന ഒറ്റപ്പേരിലാണ് ആറന്മുളയിലെ സ്ഥാനാര്ഥി നിര്ണയം ഇത്രയും കാലം മുന്നോട്ടുപോയത്. മറിച്ചൊരു ആലോചന ഇതേവരെ പാര്ട്ടിതലത്തില് ഉണ്ടായിട്ടില്ല. എന്നാല് മത്സരിക്കുമോ ഇല്ലയോ എന്നതില് വീണാ ജോര്ജ് അന്തിമ തീരുമാനം എടുക്കണം. ചികിത്സയിലും വിശ്രമത്തിലുമായിരുന്ന മന്ത്രി ഇന്ന് പൊതുപരിപാടികള്ക്കായി രംഗത്തിറങ്ങും.
യുഡിഎഫും കാത് കൂര്പ്പിക്കുന്നു
വീണാ ജോര്ജിന്റെ സ്ഥാനാര്ഥിത്വത്തെ സംബന്ധിച്ച തീരുമാനം യുഡിഎഫിനും നിര്ണായകമാണ്. നിലവില് ആറന്മുള മണ്ഡലത്തിലേക്ക് അനുയോജ്യനായ ഒരാളെ കോണ്ഗ്രസ് കണ്ടെത്തിയിട്ടില്ല. നിരവധി പേരുകള് പരിഗണിച്ചെങ്കിലും വിജയസാധ്യത പരിശോധിച്ചപ്പോള് പലരും പിന്നിലായി. പത്തനംതിട്ട ജില്ലയില് നിന്നുള്ളവരും പുറമേ നിന്നുള്ളവരും ഇക്കൂട്ടത്തിലുണ്ട്. രണ്ട് തവണ എംഎല്എ ആയിരുന്ന വീണയ്ക്ക് മണ്ഡലത്തിലുള്ള വ്യക്തി ബന്ധങ്ങളും രാഷ്ട്രീയ സ്വാധീനവും മറികടക്കാന് കഴിയുന്ന ഒരാളെ രംഗത്തിറക്കാനാണ് യുഡിഎഫ് ആലോചിച്ചത്. സാമുദായിക പരിഗണനകള് അടക്കം പരിഗണനാ വിഷയമായി.
മുന്കാല അനുഭവങ്ങള് കൂടി പരിഗണിച്ചപ്പോള് പറ്റിയ ഒരു സ്ഥാനാര്ഥിയെ ഏകകണ്ഠമായി നിര്ദേശിക്കാന് ഡിസിസിക്കു കഴിഞ്ഞിട്ടില്ല. സംസ്ഥാന നേതൃത്വവും ആറന്മുളയിലെ സ്ഥാനാര്ഥി നിര്ണയം ഗൗരവത്തോടെയാണ് കാണുന്നത്. യൂത്ത് കോണ്ഗ്രസ് ദേശീയ സെക്രട്ടറി അബിന് വര്ക്കിയുടേതടക്കം പേരുകള് പരിഗണിച്ചെങ്കിലും പൂര്ണമായി അംഗീകരിക്കാനായിട്ടില്ല. ഇതിനിടെ കേരള കോണ്ഗ്രസുമായി സീറ്റ് വച്ചുമാറുന്നതുപോലും പരിഗണിക്കപ്പെട്ടു. തിരുവല്ല സീറ്റ് കോണ്ഗ്രസ് ഏറ്റെടുക്കുകയാണ് ഇതിനു പിന്നിലെ താത്പര്യം.
